Со натпреварите кои се закажани за утре стартува продолжението на женската супер ракометна лига, а екипата на Пелистер гостува во Куманово. Оваа средба е значајна за двете екипи бидејќи ќе биде дерби за второто место на кое претендираат екипите на Пелистер и Куманово. За важноста на овој натпревар тренерот на екипата на Пелистер, Викторија Мурговска вели:
-Тежок натпревар на стартот на пролетната полусезона, а ќе играме дерби натпревар со екипата на Куманово. Натпревар во кој екипата на Куманово ќе ја има предноста на домашниот терен, но јас и девојките не патуваме во Куманово да се предадеме пред време, туку ќе одиме да се надигруваме. Имавме добро подготовки, работевме многу на секој план, тактички и кондициски, а оваа средба ќе биде вистинска контрола за тоа во каква форма е екипата на Пелистер.
Во есенскиот дел екипите на Пелистер и Куманово одиграа две средби, а и двете екипи можат да се пофалат со по една победа.
-Се работи за две изедначени екипи, а екипата на Куманово е во предност и поради поголемото искуство кое го имаат ракометарките кои неколку години играа заедно. Но, според она што ние го одигравме во есенскиот дел натпреварот ќе биде неизвесен. Тие го имаат искуството, а ние младоста и мотивацијата за победа, додава Мурговска.
Натпреварот се игра утре, сабота во салата на ОУ “Христијан Тодоровски – Карпош“ во Куканово со почеток од 19:00 часот.
