Претставници на Здружението на еднородителски семејства „Дел од сите“ од Битола, во кабинетот на градоначалничката м-р Наташа Петровска ги презентираа резултатите добиени од проектот на кој работеа изминатите месеци. Главна цел на проектот е да се утврди состојбата со еднородителските семејства во градот, нивните потреби, како и со проблемите со кои што се соочуваат секојдневно.
Според податоците на испитаниците кои учествуваа во истражувањето, а кои припаѓаат во категоријата еднородителски семејства, се добива појасна слика за натамошните делувања во насока на помош на оваа категорија граѓани. Истражувањето ќе биде проследено и до Министерството за труд и социјална политика.
Со конкретни предлози и мерки кои произлегуваат од проектот, претставничките на здружението „Дел од сите“ Катерина Тошевска и Јасминка Кочанковска договорија натамошни чекори на идна соработка и поддршка со Општина Битола. Градоначалничката Петровска истакна дека локалната самоуправа во голема мерка ќе се заложи да го подобри статусот на живот на оваа категорија граѓани.