Живописно насликан современ мурал ги украси ѕидовите на влезот од ОУ “Св. Климент Охридски“, со мотив природа, разиграни деца кои трчаат кон виножито…
Насликаниот мурал зрачи со оптимизам и пренесува порака да ја зачуваме убавата природа. Тимот ученици со менторот наставник по ликовно образование, Анкица Стевановска, создадоа дело кое го разубави училиштето и пренесува порака да не се учиштуваат ѕидовите, туку да се насликаат со креативно уметничко дело.
Директорката, Гордана Анастасова, со голема поддршка на тимот ученици и менторот задоволна од успешно завршениот проект ни изјави:
-Успешно завршен уште еден проект за разубавување на нашето училиште. Голема благодарност за овој современ уметнички мурал изработен од наставничката Анкица Стевановска и ученичките: Николина Шапарданова, Тамара Панова, Андреа Илиевска и Ангела Шапарданова. Со голема мотивација и ентузијазам го сликаа повеќе од месец и тоа во текот на летниот распуст во август.
Анкица Стевановска, ментор на тимот ученици ни кажа:
-Трудот кој го вложивме за овие месец дена се исплати. Уметничко дело на влезот од училиштето прикажува цела приказна и само со поледнување во него се будат убави емоции. Би ги пофалила учениците од мојот тим кои доаѓаа уште во 6 часот наутро, заради жешкото време за да сликаат. Но ентузијазмот беше голем и сите цртавме и сликавме со голема љубов. Таа е пренесена на муралот и можеби затоа тој толку плени со својата убавина. Би сакала да биде поттик и за други креативни дела од учениците од нашето училиште каде има многу талентирани деца. На крај би сакала да упатам порака или апел за зачувување на она што е создадено, без да се уништува, испишува, доцртува.
Жанета Ристевска
