Универзитетското студентско собрание при УКЛО во соработка со германската фондација ,,Фридрих Еберт” организира симулација на ,,Енергетски Самит” во амфитеатарот на Технички Факултет- Битола. На Самитот учество зедоа студенти од различни единици на УКЛО. Тие со голема сериозност дебатираа и се вклучија во постапки за носење одлукиво областа на енергетиката, во улога на креатори за одржливи решенија.
Од името на УКЛО на важниот студентски настан присуствуваа ректорот, проф. д-р Игор Неделковски и проректорката за студентски работи, проф. д-р Јасмина Буневска Талевска.
-Симулацијата се состоеше од три делa, прво, излагања на симулираните претставници на Владата, а потоа работа во групи и на крај дебатата во која се вклучи и публиката. Учествуваа студенти од повеќе единици на УКЛО од полето на енергетиката, медицината, ветерината, се носеа заклучоци, се споија факултетите, професиите и се анимираа студентите да учествуваат во развојни програми, рече Симона Наумовска, претседателка на Универзитетското собрание.
Придонес преку директно учество на самиот даде и директорот ЕСМ Васко Ковачевски кој рече дека ваквите симулации треба да се одржуваат колку може повеќе зашто младите луѓе треба да бидат дел од јавниот и реалниот сектор, да дадат свој придонес, а своето образование да го искористат овде во нашата држава, зашто ни се потребни. ЕСМ дава придонес во обучувањето на кадрите кои се потребни за енергетскиот сектор, па во таа насока е и добрата соработка и со Техничкиот факултет во Битола.
На почетокот на самитот учесниците ги поздрави ректорот на УКЛО, проф. д-р Игор Неделковски кој го истакна дека го радува тоа што студентите самостојно го осмислија, организираа дури и најдоа финансии за овој настан, со меѓународна поддршка каде ја препознаа моментално најактуелна тема – енергетската криза и заштедата на енергија.
