Радовиќ и Атанасијавиќ: да покажеме каква екипа сме на домашен терен

Пелистер ја отвора новата европска сезона утревечер, во салата “Боро Чурлевски“ во Битола, во 20,45  часот, против еден од поопасните ривали во групата, дански Орхус.

На еден ден пред натпреварот капитенот Мирко Радовиќ признава дека Орхус ќе биде противник каков што не сретнале оваа сезона и вели:-Добро се подготвуваме, направивме видео-анализа. Знаеме каква екипа ни доаѓа. Играат добро тимски, брзо се движи топката, тоа е таа данска школа на ракомет. Многу брзо играат, трчаат брз центар… Немаме многу време за подготовка, но ние знаеме каква екипа сме и што можеме. Во оваа атмосфера мислам дека имаме шанси и тоа ќе го покажеме во вторник. Ќе видиме колку ни одговараат со стилот. Во овој прв дел од сезоната немавме можност да се сретнеме со екипа која игра таков атомски ракомет. Но, мислам дека треба да се грижиме повеќе за нас и нашата игра. На нашата игра е акцентот. Во оваа атмосфера имаме што да покажеме и гледачите ќе уживаат како и на секој европски натпревар во Битола. Да покажеме каква екипа сме кога играме на домашен терен.И неговиот клубски колега Павле Атанасијевиќ, го дели мислењето со капитенот и додава:

-Се подготвуваме многу добро, јако тренираме. Ја гледавме данската екипа како игра, се поставуваме да играме подобро и мислам дека на крајот од денот ќе извојуваме победа. Многу добро ни дојдоа овие седум натпревари од домашното првенство, се разигруваме и тоа е многу добро за нас пред европските натпревари.