Синоќа во белата сала на Офицерскиот дом во Битола, во присуство на голем број колеги од театарот, пријатели, познати уметници и видни битолчани, како и гости од Скопје, беше отворена изложбата на костими од најуспешниот и најнаградуваниот македонски костимограф, Благој Мицевски.
Изложбата со краток говор ја отвори директорката на Културно информативниот центар, Лили Бошевска, а присутните ги поздрави и градоначалникот на Битола Тони Коњановски.
Самиот автор пак го објасни концептот на изложбата која се состои од два дела, едниот изложени костими од Битолскиот театар од претстави по дела на Шекспир и другиот дел, триесет фотографии во голем формат кои ја претставуваат неговата работа кај нас и во светот а се однесува на последната декада од неговата триесетгодишна кариера.
Фотографиите се од претстави од Опера Драма Балет, како што е насловена и самата изложба, а во соработка со режисерите Диего Де Бреа, Џон Блондел и кореографката Рисима Рисимкин.
Токму со нејзината претстава “Котел“, продолжи дружењето во Центарот за култура каде во живо видовме дел од соработката на Мицевски со Скопје Танцовиот Театар.
Оваа силна несекојдневна танцова и визуелна експресија, ги остави битолчани без здив, а тие ја наградија со долг аплауз и посакаа што поскоро да ги видат повторно во Битола.
Дружењето продолжи со коктел и ди џеј во култниот “Порта Џез бар“ каде се делеа впечатоците од оваа уметничка вечер и од прекрасниот каталог кој на пеесет колор страници го документира овој настан со краток текст и многу фотографии.
Изложбата останува отворена за посетители и во наредните денови, не пропуштајте ја.
