Вечерва, во предвечерието на Денот на ослободувањето на Битола, 4-ти Ноември, по 64. пат на Широк Сокак во Битола во организација на Сојузот на спортови на Битола и Општина Битола се одржа традиционалната ноќна атлетска трка, која годинава битолчани ја видоа и на учествуваа како трка со целосно нов концепт, на ниво на високопрофесионални натпревари од ваков вид, како дел од програмата по повод одбележувањето на Денот на ослободувањето на Битола.
На 64 та по ред ноќна атлетска трка, зедоа учество околу 800 учесници и тоа ученици од 4 до 9 одделение од основните училишта и ученици од сите 4 години од средните училишта, како и студенти, а сите трки се одржаа во машка и женска конкуренција.
На најстариот спортски настан во градот, зедоа учество и РЕК “Битола“ и Кромберг и Шуберт со машка и женска екипа, како и други граѓани.
Учесниците на трката ги поздрави градоначалникот на општина Битола, Тони Коњановски, кој изрази верување дека ваквите натпревари ќе бидат поттик за што повеќе спортски активности на младите битолчани, а почесниот претседател на Сојузот на спортови, Димче Миновски, говореше за историјатот на трката и големите спортски имиња од Битола, кои своите почетоци ги имале токму на ваков начин.
Претседателот на Сојузот на спортови на Битола, Сашко Павловски рече дека ова е 64. трка по ред, а ако оваа најстара спортска манифестација која трае најдолго во Битола, веќе 64 година, ја помножиме по колку битолчани учествувале секоја година ќе дојдеме до импозантни бројки, а се надева дека организарањето на ова трка ќе помогне за развој на спортот кај младите, а колку е значаен спортот во ова брзо време сите знаеме.
На традиционалната ноќна атлетска трка, која се одржува во организација на Сојузот на спортови, во соработка со Сојузот на училишен спорт, а со поддршка од општина Битола, за најдобрите беа доделени златен, сребрен и бронзен медал, за освоено прво, второ и трето место.
Екипни победници на трката се: од основните училишта ОУ “Коле Канински“, а од средните Гимназијата “Јосип Броз Тито“.
Наградите ги доделија градоначалникот на општина Битола, Тони Коњановски, заменик градоначалникот Бојан Бојкоски, претседателката на Советот на општина Битола, Габриела Илиевска, претставници на Советот на општината, Сојузот на спортови и познати спортисти од градот.
