Во комплекс “Касарна“, зграда “Јури“, во Битола се отвори ветеринарната клиника “Буневски“, интернационална клиника по меѓународни стандарди, со современа апаратура и инструменти за помагање и лекување на животните.
Клиниката ќе нуди ортопедски услуги, неурологија, ендоскопија и мини инвазивна хирургија (лапароскопија). Во клиниката ќе се врши процена за дисплазија на колкови и лакти, услуга за која клиниката “Буневски“ е сертифицирана од германското здружение на рендгенолози, а за првпат се воведува во нашата земја.
“Буневски“ е мост на стручна соработка помеѓу Загреб и Битола, институција која ќе соработува и разменува искуство, кадар и знаење со врвните хрватски клиники.
-По неколкугодишни активности, со денешното отворање заокруживме една функционална целина, проект кој означува ново поглавје и внесува нов квалитет во македонската ветеринарна медицина. Убеден сум дека ќе го пренесеме нашето тринаесетгодишно искуство од Хрватска, од ветеринарните клиники “Кресингер“ и “Марковиќ“ од Загреб, реномирани институции каде што се уште работиме. Ја користам оваа прилика да им се заблагодарам на колегите од Загреб за нивниот голем придонес околу логистиката, проектирањето и реализацијата на клиниката, изјави доктор Никола Буневски.
На отворањето присуствуваа гости и соработници од Македонија, Босна и Херцеговина, Хрватска и Србија.
-Голема чест и задоволство ми е да присуствувам на отворањето на клиниката Буневски. Никола беше мој студент, и повеќе од десет години работи во Загреб и важи за извонреден стручњак во лекување на домашните миленици бидејќи станува збор за голем стручњак за подрачјето на меката хирургија и ендоскопија. Ќе ми биде мило и со задоволство стоиме на располагање во стручна помош на оваа клиника, рече доктор Марио Кресингер ид Ветеринарниот факултет од Загреб.
