-Вечерва во Старата чаршија во Битола се ширеа мелодичните звуци од изворните македонски песни и други популарни мелодии во изведба на групата “Боеми“ од Битола, на првата вечер од 6. по ред “Фестивалот на староградска музика“.
Старата битолска чаршија, местото на еснафите на Битола – градот со голема традиција и богато културно – историско наследство, градот кој со себе носи многу приказни кои се раскажувале, се надградувале и менувале, онака како што градот го менувал својот лик. Токму таму на местото каде што денес е спојот на ориенталното и градското живеење во единствениот, делумно сочуван дух се одржа првата вечер од „Фестивалот на Староградска музика и вино“.
Чаша добро вино “Ciflik Winery“ и одлична стаградска музика, но и македонски популарни шлагери. Целта на овој настан е сите, заедно да го вратиме духот на битолската чаршија. Многу присутни уживаа во боемска вечер со вино и групата “Боеми“.
Дел од нив сега веќе возрасни битолчани, носталгично се вратија во својата младост кога тука излегувале, вљубувале, дружеле… Тие се присетуваа дека еден период поточно во 90 години, тука и се случувал културно- забавниот живот на битолчани и тоа не само во лето, туку и преку целата година. Голем број на кафулиња, ресторани каде до доцна во ноќите музиката не била проблем за околината.
-Овој фестивал се одржува шеста година по ред и со него сакаме да го вратиме сјајот на битолската чаршија и можеби со повеќе вакви манифестации ќе заживее во овој летен период. Амбиентот е создаден за ваква музика и уживање во неа со чаша вино од винаријата “Чифлик“. Вечерва тука се собраа повеќе генерации, рекоа организаторите.
Фестивалот продолжува утре на истото место со групите “Гердан“ и “Битолски тамбураши“, а како и вечерва ќе се бара место повеќе.
Ж. Ристевска
