Еурофарм Пелистер од Битола ќе биде финалист на 2. по ред меморијалниот турнир “Крсте Андоновски“ во Охрид по победата над екипата на Татран Прешов со резултат 29:24, полувреме 14:12.
“Пелистерци“ на стартот поведоа со 4:1 во 6. минута, а потоа водството беше цело време на страната на битолчани. Највисоката предност битолчани имаа 9:5, а на одмор се отиде со 14:12. На стартот на второто полувреме Татран израмни на 16:16, а по серија од 3:0 Пелистер стигна до 19:16. Во продолжението од мечот се играше брз ракомет, без одбрани. 24:22 водеше Пелистер пред финишот, а по две одбрани на Гедбан, како и со по еден гол на Танкоски и Костески се стави точка на триумфот во финишот.
Претходно, во првото коло во салата “Билјанини извори“, битолчани беа поуспешни и славеа над Бутел Скопје со убедливи 32:21, полувреме 12:10.
Денес Еурофарм Пелистер ги игра последниот натпревар во групната фаза против екипата на Металопластика, а финалето е закажано за утре во 20:15 часот во салата “Билјанини извори“.
