Германски Кил од вчера е во Битола, а одработи и тренинг во салата “Боро Чурлевски“, најдобриот тим во ланската сезона во Бундеслигата вечер ќе биде противник на македонскиот шампион, Еурофарм Пелистер од Битола.
На прес-конференција натпреварот на “пелисѕерци“ против еден од најдобрите европски тимови го најави левото крило на битолчани, Цветан Кузманоски, кој рече:
-Сите знаеме каква екипа е Кил. Гледавме видео материјали, се обидовме да ги анализираме. Се надеваме на добра и борбена игра, без голем респект кон нив, иако имаат ракометари од светски рамки. Верувам дека ќе дадеме максимум и тоа ќе ни донесе добар резултат. Добро отворивме против Алборг, но веројатно од неискуство дозволивме лесни голови и огромно заостанување. Имавме избрзани шутеви, пад на концентрација и сигурно неискуство, па Алборг дојде до убедлива победа. Кил е исто така нова екипа, сепак е септември и поразите во Бундеслигата се вообичаени.
