Со традиционалниот прием на претставници од општинската организација на Сојузот на борци од Битола, во кабинетот на градоначалникот на Битола – Тони Коњановски, започнаа денешните настани за одбележување на Денот на ослободувањето на Битола, а продолжија со положување на свежо цвеќе пред Споменикот на НОАВМ пред Центарот за култура, Споменикот на народниот херој Стив Наумов и Партизанските гробишта во Битола.
Пред спомен обележјата, почит оддадоа, градоначалникот на општина Битола – Тони Коњановски, Министерката за култура – Бисера Костадиновска Стојчевска, претставници на Советот на општината, Сојузот на борци, претставници на збратимените градови Епинал, Пожаревац и Осиек, како и претставници на политичките партии. На партизанските гробишта, свежо цвеќе положи заменик градоначалникот Бојан Бојкоски.
Градоначалникот Коњановски, испрати честитка до присутните гости и сите жители на општина Битола:
-Денес, кога одбележуваме 79 години од ослободувањето на Битола, со голема почит, кон луѓето кои ги дале своите животи за денешната слобода, горди сме на значајните културно – историски вредности кои ги поседува нашиот град, што уште повеќе ја зголемува должноста, да направиме многу повеќе за напредокот на Битола. Наша обврска е да продолжиме да го градиме најубавиот град, да ги подобруваме условите за живот на сите граѓани, а пред се да бидеме мотив за творештво и работа на младите генерации на овие простори. Затоа, како локална самоуправа и дејствуваме во таа насока, преку реализација на бројни проекти и зајакнување на меѓународната соработка, со цел зголемување на можностите за инвестиции, напредок и развој. НЕКА ТИ Е ЧЕСТИТ ПРАЗНИКОТ НАЈУБАВА БИТОЛА!“, се вели во честитката од градоначалникот Коњановски.
По повод 4 Ноември, Денот на ослободувањето на градот Битола од фашистичкиот окупатор, министерката за култура, Бисера Костадиновска – Стојчевска положи свежо цвеќе на споменикот на паднатите борци од НОАВМ во с. Лавци.
-Како министерка за култура и како внука на носител на Партизанска споменица, горда сум што оваа Влада не ги заборави и со почит ги ревитализира паметниците кои сведочат за македонскиот отпор. Еден од нив е и во херојско Лавци – Споменикот на паднатите борци. Антифашизмот во Битола и во Битолско е вечен порив и повик. Зашто: „Народ задоен со борбата за слобода никогаш не умира, истакна министерката Костадиновска – Стојчевска.
Цвеќе положија и делегации на политичките партии ВМРО-ДПМНЕ, СДС, ПОДЕМ, Левица.
Во четиригодишната народноослободителна и антифашистичка војна, околу 270 борци од Битола и Битолско ги дале своите животи за слободарска Битола.
