Фудбалерите на Пелистер од Битола по две години повторно ќе игра во Првата македонска фудбалска лига. Битолчани со скоро нов тим ќе играат за што е можно подобар пласман, а прв натпревар ќе биде денес во 17 часот против екипата на Гостивар.
Борче Маневски кој оваа сезона има друга улога, помошник тренер во Пелистерза првиот прволигашки натпревар во Битола рече:
-По две години сме пак во Првата лига и сме во исчекување на првото коло. Битола повторно ќе може да гледа прволигашки фудбал. Екипата мислам дека е подготвена затоа што работевме напорно. Ни следи натпревар против Гостивар, се надеваме на поддршка од публиката да успееме во нашата цел, тоа е добро да стартуваме со сезоната. Пелистер секогаш ги сака трите бода. Респект за Гостивар, се работи за екипа која е организациски и финансиски на доста високо ниво, но нашата цел е секогаш да дадеме максимум на терен, па нека победи подобриот.
За денешниот Александар Ристевски ветува максимална борба за бодовите да останат на стадионот „Петар Милошевски“ и вели:
-Пресреќен сум затоа што се вратив во мојот матичен клуб и сум максимално мотивиран. Напорно работевме месец и пол и со нетрпение го чекаме мечот. Имаме респект кон Гостивар, донесоа добри играчи, тие се квалитетна екипа, но и ние имаме квалитет. Минавме одлични подготвки и сме добро подготвени за овој натпревар. Очекуваме и поддршка од публиката од “Чкембарите“, со нивна помош можеме до резултати.
