Во морето вести за хулиганство во Битола и уништување на урбана опрема, паркирање каде не треба, кршење на дрвја и што се уште не, четири дечиња, секако заедно со своите родители направија нешто што треба да е пример за децата, возрасните, планинарите… за сите нас. 
Јана, Вања, Стефан и Кики поминаа одличен викенд на Баба планина, испешачија 25 километри на Пелистер и попат го собраа ѓубрето кое го оставиле возрасните “љубители“ на планината.
Викенд планинарската тура ја започнаа преку Болници до Антена, потоа Мало езеро, Големо езеро, Орлови бари и слега по Сапунчица.
Вкупно поминаа 25 километри и на Вања – 9 години, Јана 7, Стефан 9 и на Кико со само 5 години ова им беше прв пат да поминат толкава должина.
Поминаа одличен викенд, ги видоа знаменитостите на Пелистер, го собраа ѓубрето, покажаа патриотизам – го развеаја знамето на Македонија, и на крај Вања ни упати силна порака на сите нас:
-Не фрлајте ѓубре на планината, за да ни биде чиста како роса на Пелистер.
С.Ристевски
