Денес битолчани кои се движеа по Широк Сокак да завршат некоја работа или пак едноставно да се појават на кафе-шема имаа прилика по втор пат да ги слушаат и гледаат, триото музичари.
Триото кое ги забавуваше битолчани се состои од една жена и двајца мажи кои свират на жичани инструменти, две гитари е една мала гитара. Со нив може да се забележи дека има и мало дете од две-три години, за кои битолчани на мајтап велеа дека е касиер.
Битолчани различно реагираа на овие музичари, но најголемиот број им пријдоа и како на сите улични групи им оставија некој денар во торбата од гитарата.
Но, дел од нив велат дека го сакаат Индијанецот кој неколку години свиреше и пееше на Широк Сокак, и дека тамам се научиле на неговата музика, ќе треба да се навикнуваат на музиката на триото, ако им се бендиса тука и ако заседнат во Битола.
