Националната установа Универзитетска библиотека „Св. Климент Охридски“ – Битола во соработка со ОУ „Даме Груев“ – Битола ќе го одбележат Меѓународниот ден на мајчиниот јазик, утре среда 21 февруари со почеток во 12 часот.
Настанот ќе започне со прикажување на документарниот филм за Кирилицата и Словенската писменост во Македонија. Претходно ќе има кратко обраќање на директорката на НУУБ „Св. Климент Охридски“, м-р Јелена Петровска. Свое излагање ќе има м-р Билјана Герас на тема „Мајчиниот јазик – наш идентитет и наша култура“, а модератор на настанот е Божидар Николовски.
Јазикот е културно наследство во коешто се обединува духовната и материјалната култура на човештвото. Македонскиот јазик е најреферентното обележје на македонскиот народ. Да се занемари македонскиот јазик, значи да се занемари естетиката на македонската историја, меморија и современост.
Јазикот е неизбришлив дел од културната меморија на еден народ, независно од тоа дали тој е голем или мал. Од гледна точка на јазичните и естетските вредности, не постојат мали и големи јазици, мали и големи книжевности, мали и големи културни мемории! Таа поларизација се прави само од гледна точка на глобализирачките и империјалистичките интереси на моќните држави. Затоа секоја јазична и книжевна практика треба да се негува како привилегија на човечката цивилизација и како неотуѓиво право на народите во светот.
Колку и да е навидум мал македонскиот јазик, неговата улога во развојот на европската цивилизација е голема.
