Друштвото “Крклино“ од истоименото село близу Битола важи за едно од најорганизираните во македонската заедница во Канада, барем кога станува збор за прославата на нивниот свет ден и селска слава, Тодорова Сабота.
Иако бројот на Крклинци во Торонто не е голем, славата се памти како една од најголемите во битолската околија, а таа традиција ја пренеле и на овој континент.
На 28 февруари годинава во црквата “Св. Климент Охридски“ беше одржана прославата на Тодорова Сабота на која кумуваа Миле и Соња Митковски. Со чинот чествуваа Прота-ставрофор Трајко Босеовски и Отец Горан Ристевски, а догодина кумови ќе бидат Диме и Мери Малаковски.
Диме Малаковски кој воедно е и претседател на друштвото, им се обрати на присутните посакувајќи им убава и весела вечер, а на крајот на оваа Крклинска вечер задоволно истакна дека е радосен што од година во година бројот на младите кои присуствуваат на истата е се поголем. Со тоа нашата мисија е исполнета, рече Малаковски.
Со оглед на велигденските пости, на прославата се служеше посна македонска храна подготвена од вештите раце на позната македонска готвачка Марија Ангелевска и нејзините помошнички.
На традиционалната Крклинска вечер гостите ги забавуваше музиката на Соња и Оливер Бенд, а си заминаа задоволни и од добиените награди во богатата лотарија.
Со своја изведба се претстави и познатата крклинка, активистка во црквата “Св. Недела“ во Ејџекс, Паца Стјуарт.
Извор: весник “Македонија“ од Торонто, Канада.
