Сојузот на училишен спорт, денес им ги додели наградите на најуспешните ученици и екипи од основните и средните училишта во општината, кои во текот на учебната година, спортуваа, се натпреваруваа и освојуваа значајни резултати.
За најдобра екипа во средните училишта е прогласена спортската екипа на Горната Гиманзија, а кај основните училишта ОУ “Св. Климент Охридски“, а за најдобри професори по физичко образование се прогласено Антонио Трпковски и Предраг Созовски.
Сојузот за училишен спорт посебно признание и подари на градоначалничката на Битола, м-р Наташа Петровски, која рече:
-Денес ги имаме победниците на сите овие натпревари. Секогаш велам: училишниот спорт е токму расадникот на спортот и токму тој треба да биде поддржуван од Општина Битола. Моите заложби и во иднина ќе бидат токму во таа насока – овој спорт да биде максимално поддржан, а средствата за училишен спорт да се зголемат, наспроти средствата за професионален спорт, затоа што професионалниот спорт, согласно законот треба да биде финансиран и од други извори. Само на тој начин, би имале добар расадник и би имале добра завршница во делот на професионалните екипи.
Со континуираната реализација на квалитетни дополнителни, спортски програми кои на нашите деца и младинци им даваат можност за правилен телесен развој, интелектуален, естетски и морален раст, се прави значајно доближување на децата и младите луѓе до спортските терени.
Дел од тие програми се и: реализацијата на училишните општински првенства, активност во која беа вклучени 3.000 до 4.000 ученици од 20 училишта, во вкупно 28 првенства во машка и женска конкуренција во кошарка, ракомет, одбојка, футсал, фудбал, шах, пинг-понг, реализација на ноќната трка по повод 4 ноември, како и реализација на големиот број други активности.
Сојузот на училишен спорт беше домаќин и на регионалните првенства во кошарка, футсал, голем фудбал и одбојка, а сите реализирани активности континуирано беа поддржувани од Општина Битола.
Наградите за екипните победници и наградите за најдобрите професори го додели координаторот на советничката група на СДСМ во Советот на општина Битола, Методија Илиевски, а наградите на најдобрите екипи ги доделија домаќините на натпреварите.
