Вчера, во текот на целиот ден, на денот на празникот на градот Битола, “4-ти Ноември”, Офицерскиот дом беше отворен за сите граѓани кои сакаа да го посетат и да ја видат неговата преродба, а ги имаше многу кои дојдоа, го разгледаа, повозрасните ги вратија спомените кои ги имаат од тами пред 4-5-6 децении, а помладите го видоа и секако направија илјадници фотографии.
Во текот на целиот ден вчера, сите битолчани ги пречекаа и почестија до музика, на музичкиот маратон, кој го одржаа учениците од Државното музичко училиште од Битола.
-Ова е голем настан за сите битолчани, бидејќи повторно ја имаме убавината на офицерски во Битола, а посебно чест за нас за моите колеги и за нашите ученици што имавме музички маратон на кој тие настапија. Се надевам дека нашите ученици ќе имаат во иднина голем број на врвни концерти кои ќе ги имаат како врвни музичари токму во оваа концертна сала, а ние ќе се гордееме со нив, рече професорката Маја Митровска.
Учениците го оплеменија просторот со звуците на класичната музика, а настапија ученици од основно и средно образование, застапени беа инструменталистите од сите класи на училиштето. Музичкиот маратон траеше од 10 до 15 и од 17 до 20 часот.
