Денес на пладне, на Широк Сокак во Битола, на плоштадот “Магнолија“ по повод Денот на младиот читател, како и за промоција и афирмација на германскиот јазик, учениците од Гимназијата “Јосип Броз-Тито“ организираа флешмоб.
Идејата, како рекоа организатоите, произлезе од самите ученици на часот по германски јазик, кога тие учеа и читаа текстови за флешмоб.
Со поддршка на Младинскиот совет при Општина Битола и соработка со “Анастасија центар“ е реализиравме нивната идеја.
-Учениците активно и посветено се спремаа еден месец, беа редовни на многубројните проби, а посебно за пофалба се машките ученици кои на почетокот делуваа многу несигурно. Целта на флешмобот е да се поттикнат учениците да читаат, бидејќи книгата им отвора нови светови, но и да изучуваат странски јазици кои се прозорец кон светот. Токму затоа избравме стара и многу позната германска песна, рекоа Ирена Петровска, Нина Илиќ и Марија Стојановска организатори на овој флеш моб и додадоа:
-Уште на самите проби учениците покажаа одговорност, меѓусебно помагање и емпатија што е многу важно за нив. Упатуваме голема благодарност до Општина Битола, “Анастасија Центар“ и козметичкото студио “ИВА“ за финансиската поддршка, како и до сите вработени во Гимназијата за покажаното разбирање за нашите проби.
Фото: Дамијана Ристевска
