Универзитетот „Св. Климент Охридски” од Битола е првиот македонски универзитет што официјално е дел од меѓународната иницијатива „More Than Our Rank“ (https://inorms.net/more-than-our-rank/) која им дава можност на академските установи да ги истакнат различните начини на кои ѝ служат на заедницата, иако истите не се рефлектираат во нивната рангирана позиција.
Иницијативата е развиена како одговор на дел од проблематичните карактеристики и ефектите од глобалното рангирање. Со учеството во „More Than Our Rank“, академските установи укажуваат на потребата за одговорно оценување и признавање на поширока и поразновидна дефиниција за институционален успех.
Инаку, „More Than Our Rank“ е поддржана од голем број меѓународни научни институции и респектабилни организации меѓу кои се: CLASCO FOLEC, Centre for Science and Technology Studies (CWTS) at Leiden University, DORA, European Consortium of Innovative Universities, The European University Association (EUA), Emerald Publishing, HuMetricsHSS initiative, Science Europe, UK Forum for Responsible Research Metrics, U-Multirank.
Во оваа меѓународна иницијатива УКЛО гледа перспектива за свое автентично афирмирање во светски рамки благодарение на неговата различност, инклузивност, одговорноста кон заедницата и влијанието што го остварува во поширокиот општествен контекст.
