На денот кога пред 120 години беше убиен апостолот на Македонија, Гоце Делчев, во Битола беше одбележана неговата годишнина со драмскиот ораториум „Баница 1903-Стратегот на македонскиот универзум“ од македонскиот драмски писател Зоран Пејковски, и со документарниот филм „Македонија во слики“ од Арсениј Јовков.
На задоволство на вистинските Македонци, на кои Македонија им е пред се, во Офицерскиот дом во Битола, претставен беше драмскиот ораториум „Баница 1903- Стратегот на македонскиот универзум“, по повод 120-годишнината од смртта на Гоце Делчев.
Актерите, Роберт Велјановски, Јулијана Мирчевска, Рубенс Муратовски и Васко Мавровски, преку нивната брилјанта игра доловија дел од една македонска вистина сплетена низ црнилата, преку кои морало да помине македонскиот народ, која навистина траурно боли.
А боли затоа што и ден денес се повторуваат тие безочни предавства, кои водат кон едно безочно уништување на цел еден народ, на цела една цивилизација.
Вонредниот професор Мими Ѓоргоска-Илиевска, експерт за филмска дејност и заштита на аудиовизуелното културно наследство, пак, говореше за документарниот филм „Македонија во слики“ од Арсениј Јовков, кој оваа година ја бележи својата 100-годишнина.
Во филмот битолчани меѓу другото ги видоа и оригиналните снимки од префрлањето на саркофагот на Гоце Делчев, од домот на Михаил Чаков, во катедралната црква „Св. Недела“.
Александар Јорданоски, пак, лингвист и експерт за културно наследство зборуваше за јазичниот стил во револуционерната поетика, а пак професорката Виолета Ачкоска зборуваше за историското значење на Гоце Делчев.
Се разбира кон овие историски моменти проговори и професорот Александар Јаневски кој се обиде да ја разјасни сликата околу предавството на Гоце Делчев и предавствата во Македонската револуционерна борба.
Се на се, битолчани имаа можност да видат еден прекрасен културен настан, со кој всушност се поттикнува Македонецот, да биде едно хомогено, македонското цврсто ткиво, кое и покрај се, борејќи се за македонската национална свест, ќе опстои со силен зрак како симбол во пазувите на Република Македонија, затоа што повеќе од јасно е дека Македонецот е предодреден да се бори за својата чест и националното достоинство.
