На Правниот факултет ДС Битола беше промовирана Монографијата „Функционална анализа на Народниот правобранител во Република Северна Македонија која е резултат на обемно научно-истражување кое се реализираше од страна на тим професори од Правниот Факултет- Кичево и тоа: проф д-р Мирјана Ристовска, проф д-р Светлана Вељановска, проф д-р Никола Тунтевски, доц д-р Иле Масалковски, и проф д-р Елизабета Спироска од Меѓународниот славјански универзитет од Свети Николе.
Рецензентите на трудот проф д-р Ристо Речкоски и проф д-р Саша Дукоски меѓу другото истакнаа дека истражувањето врз кое се темели Монографијата е направено во подолг временски период а резултатите кои се објавени ќе бидат од голема корист за стручната јавност. Според нив истражувањето покажува дека е потребна поголема институционална соработка и корекции во законските решенија кои ја регулираат оваа проблематика, бидејќи, кога станува збор за почитувањето и практикувањето на човековите права никогаш не е премногу да се зборува и истражува, односно секогаш може да се направи повеќе од она што е направено.
Содржината на Монографијата ја презентираа авторите.
Проф. Вељановска ги презентираше научните цели на истражувањето и неговата општествена важност. Во тој дел се сублимирани карактеристиките на институцијата Народен правобранител, неговиот институционален развиток и законските решенија кои постојат.
Проф. Тунтевски ги презентираше податоците добиени од анкетните прашалници направени меѓу испитаниците од општата јавност. Она што е специфично за нив е дека најголем дел од нив се запознаени за постоењето на Народниот правобранител но дека најчесто за неговото работење дознаваат од медиумите и потребна е поголема проактивност од самата институција за подобро да биде претставена во јавноста.
Проф. Ристовска се осврна на делот со податоците добиени од испитаниците во делот на стручната јавност. Овде е индикативно дека испитаниците имаат забелешки на начинот на избор на Народниот правобранител како недоволно објективен. Во поглед на комуникацијата со Народниот правобранител и ефектите од тоа испитаниците се изјасниле дека делумно се задоволни пред се поради тоа што се смета дека се потребни повеќе законски надлежности од процесно-правен аспект и дополнителни човечки и финансиски ресурси за оваа институција.
Заклучоците кои произлегоа од ова истражување се во насока на поддршка и развој на оваа институција во вистинска насока што ќе значи и трајно развивање на демократијата во нашата држава и зголемување на ефикасноста на работењето, пред сè на државните органи,органите на државната управа, органите на единицата на локалната самоуправа и другите органи и организации што имаат јавни овластувања.
