Пелистер – Чаир 77:73
Вечерва во Битола Пелистер одигра одличен меч и заслужено славеше над Чаир кој имаше само еден пораз во досегашниот дел од сезоната, по голема борба со резултат 77:73. Ова е важна победа со која битолчани покажаа и квалитет и карактер, како најава за излез од резултатската криза во која Пелистер се најде во изминатиот период.
Пелистер почна да доминира уште во првата четвртина и градеше резултатска позитива. На ниво беше одбраната, која за десет минути игра го запре противникот на само 13 поени и овој дел од мечот заврши со водство на Пелистер од 22:13.
Втората започна со тројка на Стајиќ за 25:13, но потоа следеше голем пад во играта, што Чаир го искорити за да направи серија од 0:11 и целосно да се врати во натпреварот. Серијата на противникот ја запре Мишковиќ со тројка, потоа прецизни од далечина беа и Костоски и Лука Стојановски, за пред крајот на полувремето во ритам да влезе и Бојиќ и на одмор се замина со водство на Пелистер од 40:32.
Бојиќ ги постигна првите четири поени за Пелистер во третата четвртина, „зелено-белите“ имаа најубедливи +9 (51:42) во овој дел од мечот, но Чаир не се откажа, па со тројката на Тачи од сопствената половина гостите на крајот од третата четвртина намалија на 60:56.
Чаир намали на 64:63, но Американецот Антоан со тројка го врати Пелистер на „плус четири“. Лука Стојановски погоди за 70:63 на помалку од четири минути до крајот, но потоа дојде до голем пад во играта на домашниот состав, па Чаир на една минута до крајот израмни на 70:70. Во клучните моменти повторно пресуди Антоан со тројка, поени постигна и Бојиќ, и тоа по офанзивен скок, а Стајиќ со контранападот по украдена топка стави печат на победата, на крајот изразена со конечните 77:73.
Андрија Бојиќ со 18 поени беше прв стрелец на Пелистер во оваа победа, Мишковиќ стигна до дабл-дабл од 15 поени и 10 скокови, 15 поени имаше и Стајиќ, а со 13 поени мечот го заврши Антоан.
Пелистер во следното коло го очекува гостување во Скопје против екипата на Вардар.
