Здружение на лиценцирани енергетски контролори претставувано од претседателката Весна Неделковска од Битола и Министерство за енергетика рударство и минерални суровини претставувано од министерката Сања Божиновска потпишаа меморандум за соработка, со што е официјализирана успешно започнатата соработка со Министерството, се со цел унапредување на енергетската ефикасност во секој сегмент од општеството.
Ова е значаен чекор во подобрувањето на работите со енергетската ефикасност, како во законската регулатива така и во успешната имплементација на истата. Целта е преку здружување на експертизата и институциите да се забрза унапредувањето на енергетската регулатива и стручна поддршка. Меморандумот предвидува активности како промоција на енергетска ефикасност, размена на информации, стручна и техничка поддршка, како и организирање на трибини, обуки и настани.
-Преку здружување на стручноста и ресурсите, ќе работиме на подобрување на законодавството и создавање конкретни придобивки за граѓаните. Ова партнерство е нашата посветеност кон поефикасна иднина, истакна министерката за енергетика Сања Божиновска.
Претседателката на ЗЛЕК, м-р Весна Неделковска, нагласи:
-Соработката со Министерството ќе овозможи поефективно користење на нашето знаење и експертиза. Заедничките активности ќе придонесат за значајни чекори во афирмацијата на енергетската ефикасност.
Здружението на лиценцирани енергетски контролори на Македонија (ЗЛЕК) е професионална организација која има цел промоција и унапредување на енергетската ефикасност преку обезбедување енергетските контроли да ги вршат соодветно обучени и овластени ревизори, релевантни за секој пазар. Обезбедуваат консултантски услуги, стручна анализа и помош во конкретни проекти поврзани со енергетската ефикасност. Преку своите активности, ЗЛЕК придонесува кон подобрување на законодавната рамка, едукација на професионалците и јавноста, како и практична имплементација на мерки за енергетска ефикасност во Република Македонија.
Оваа соработка со Министерството за енергетика, рударство и минерални суровини претставува значаен чекор кон зајакнување на енергетската ефикасност и одржливиот развој на енергетскиот сектор во земјата и ја поставува основата за иновативни пристапи во справувањето со енергетските предизвици.
