-На последниот викенд во оваа 2014 година година голем број битолчани одвоија време за уживање на декемвриското сонце со многу забава и во комбинација со скијање, санкање, бордање…, а сето тоа беше надополнето со новогодишната магија на Дедо Мраз на “Mint Fintech Group“ кој беше со најмладите на ски-патеката “Ниже Поле“ со која стопанисува “Стрежево“ од Битола.
Многубројни возила, според регистарските таблички покрај битолски ги имаше од Прилеп, Охрид, Ресен, Демир Хисар, вака и започна поседната недела оваа година создадена за уживање во убавините на снегот кој долго се очекуваше. Особено го очекуваа оние кои рекреативно или професионално се занимаваат со зимски спортови. 
Некои го очекуваа, некои ги изненади, но со своето доаѓање Дедо Мраз донесе многу магија и расположение особено кај најмладите во ски-центарот “Стрежево“, а сето тоа донесе забава со Дедо Мраз, и се направија стотици фотографии за спомен од овој ден.
-Денот го имавме резервирано во најмладите, кои денес уживаа на снегот и сонцето кое го имавме денес. Дизајниравме Дедо Мраз во боите на нашата компанија “Mint Fintech Group“, а сето тоа го подготви костимографот Благој Мицевски. Уште со самото пристигнување најмалите се израдуваа, а Дедо Мраз им подари на сите мали подароци. Дедо Мраз доаѓа заедно со снегот, а денес имавме токму таков ден, кој сите не израдува. Ова не е единственото изненадување кое “Mint Fintech Group“ ќе им го приреди на нашите најмали битолчани кои уживаа во ски-центарот “Ниже Поле“, ни рече Марјан Вучковиќ од “Mint Fintech Group“ од Битола.
Битолчани уживаа во убаво подготвената патека за скијање, бордање, а беше подготвена и посебна патека за безбедно санкање. Зимско летниот туристичкиот центар и ски-патеката “Ниже поле“ се наоѓа на 15 километри од Битола, со истиот стопанисува ЈП “Стрежево“ и деновиве беше подготвена. Поразговаравме со дел од тимот задолжени за подготовките на ски-центарот.
Ице Велјановски, раководител на ски-терените за нивното подготвување вели:
-Врнежите од снег кој го имаме доволно овој период од годината ги искористивме одлично да ја подготвиме ски-патеката на која фукционираат и ски-лифтовите. Ски-патеката секојдневно се доуредува и е подготвена за денско и ноќно скијање, секако кога дозволуваат условите. Нашите екипи се постојано на ски-патеката и се надеваме дека долго време ќе биде во функција за разлика од претходните години кога имавме малку врнежи од снег. Ратракот е во работа секојдневно, а искусните оператори тоа го прават одлично, а за тоа добивме голем број на пофалби и скијачите. Ски-центарот Ниже поле го опслужуваат вработени, секој на работно место со своја тежина и одговорност, а се трудиме се да биде во најдобар ред за гостите кои ни доаѓаат. 
Денес поради енормно големиот број на возила се јави и мал застој на движењето на возилата, за што Велјановски додава:
-Патот е тој и мораме да се прилагодиме на него. Сакам да упатам апел до возачите да ги почитуваат насоките од редарите на “Стрежево“ кои се секогаш на патот. Подобро е да ги следиме нивните насоко отколку да се направи метеж, а возачите и патниците да бидат и по половина час во возилата, наместо да уживаат на сонцето и снегот. Сакам во име на “Стрежево“ да упатам и благодарност до СВР Битола кој денес ни помогна да го регулира сообраќајот до ски-центарот, а тоа го прави секогаш.
Чајџилницата во ски-центарот деновиве е најпосетувано место деновите, иако има голем ред сепак сите беа услужени.
-Викендите се секогаш полни со гости, па така е и денес. Има гужва, но добро сме екипирани и сите наши гости беа послужени со кафе, чај, сендвичи… На гостите им нудиме топли напитоци и храна по поволни цени и секако им нудиме и квалитет, а тоа покрај снегот им е потребно не само на скијачите и бордерите туку и на напите гости кои се тука само да уживаат во сонцето и чистиот воздух. Вели Александар Цветановски раководител на чајџилницата.
-Прекрасното време беше причина за да дојдеме уште рано, поголемиот син да скија, а помалиот да се радува на Дедо Мраз. Тука има добра атмосфера, секој на свој начин ужива во планинските убавини. Еве синот со другарчето се на скии и се неуморни. Едвај го дочекавме снегот оваа година и најубаво е тука, не би оделе подалеку, снег има доволно за скијање, ни порача една мајка. 
Прекрасната глетка на убавините на снежните планински пејсажи на зимско сонце со контраст сино небо, свеж воздух, а сето тоа придонесе барем за миг, да се заборават секојдневните проблами. Ден за опуштање, добра атмосфера и расположение и зависно од возраст секој на свој начин уживаше во планинските убавини.
Текст и фото: Сашо Ристевски
