Атлетски клуб Олимп од Битола ја отвори сезоната со одлични резултати на 7. Кавадаречки полумаратон, првата трка од новоформираната Македонска тркачка лига. На патеката од 5 километри, клубот забележа два подиуми и силно присуство во конкуренцијата.
Најуспешна во женска конкуренција беше Дарија Крстевска, која триумфираше со убедливо прво место, додека Јана Стефановска со одлична трка го освои третото место. Стефановска, и покрај студиите на Медицинскиот факултет во Штип и предизвиците со тренинзите, покажа извонредна подготвеност.
Покрај нив, за АК Олимп на трката настапија и Томе Кирјази, Теодор Николовски и најновото засилување во тимот, Јана Митановска, кои со своето учество во заокружија успешниот старт на новата сезона за клубот.
Голема заслуга за овие резултати оди и на адреса ма тренерот Демир Даутовски, кој континуирано работи на развојот и подготвеноста на атлетичарите. Ова е само почеток за АК Олимп, кој и оваа сезона има амбиција да доминира на македонските атлетски патеки и да остварува врвни резултати.
Следните натпревари ќе бидат уште една можност за тимот да го потврди својот квалитет и да продолжи со победничкиот ритам. АК Олимп – продолжува да биде гордост на битолската атлетика
