Со интенција секогаш да биде во чекор со современите музички случувања, здружението на пијанисти и музички педагози “Пијано“ од Битола го креираше првиот “Виена Гала Фест“. Ова е уникатен музички настан дизајниран да ги едуцира и инспирира музичарите од целиот свет, помагајќи им да го откријат својот музички потенцијал.
Селектирајќи ги најдобрите млади таленти на сите инструменти и од сите земји ширум светот преку он-лајн натпревар, на најдобрите натпреварувачи им се пружи незаменливо искуство да настапат на фестивалот “Виена Гала Фест“ кој имаше цел да ја зајакне музичката култура, да го промовира вреднувањето на класичната музика и да имплементира иновативни образовни методи за младите таленти кои се стремат да ја продолжат својата музичка кариера преку различни инструменти.
На он-лајн селекцијата, жири комисијата, составена од еминентни музички педагози од Америка, Русија и Австрија селектираше победници кои што освоија златни медали и на кои што организаторот им испрати покана за настап во Виена. Концертот во познатата сала “Ehrbar Saal“ беше посветен токму на победниците од првото издание на “Виена Фест“. Со учество на околу 90 натпреварувачи од 19 различни земји, настанот беше големо музичко случување, кое ги собра најдобрите млади музичари од светот во центарот на културата – Виена.
Државното музичко училиште од Битола учествуваше со наградените ученици:
-Симон Четелев 3 одд. – проф. Вера Поповска,
-Марко Буџаковски 4 одд. – проф. Јана Четелева Белевска,
-Алексеј Белевски 6 одд. – проф. Доминика Робе Поповска,
-Јане Петровски 7 одд. – проф. Јана Четелева Белевска,
-Фотина Наумоска 7 одд. – проф. Доминика Робе Поповска,
-Теона Буџаковска 7 одд. – проф. Јана Четелева Белевска,
-Изабела Ѓеоргиев 9 одд. – проф. Доминика Робе Поповска,
-Тамара Василевска 1 клас, – проф. Верица Дивитарова,
-Емануел Петрески 1 клас, – проф. Јана Четелева Белевска,
-Јана Стојковска 2 клас, – проф. Вера Поповска,
-Теона Ванеска 2 клас, – проф. Јана Четелева Белевска,
-Климент Ристески 3 клас,- проф. Маја Митровска.
На настанот се претстави и проф.м-р Анастасија Гическа како дел од победниците на натпреварот.
Овој фестивал обезбедува можности за поврзување со други посветени млади музичари, да се искусат музичките престолнини во светот и да се настапи на светски позната престижна меѓународна сцена. “Виена Гала Фест“ ја поттикнува креативноста и самоизразувањето, нудејќи им на учесниците шанса да допрат до меѓународна публика за време на концертот на победниците токму во оваа прекрасна сала.
Изминативе 4 години здружението “Пијано“ со свечени настани го одбележуваше 30. март кој што е и Меѓународен ден на пијаното. Оваа година го круниса јубилејното петто издание од овој настан со извонредниот концерт на победници во “Ехербар“ салата во прекрасната Виена.
