По вчерашната одлука на Владата со која се одобрува основање на Факултет за медицински науки и здравство при Универзитетот „Св. Климент Охридски“ – Битола, се отвораат нови перспективи за развој на високообразовното и здравственото поле во Битола и регионот.
Факултетот, кој ќе функционира како нова организациска единица во состав на УКЛО, е замислен како одговор на зголемената потреба од здравствени професионалци, не само во Пелагонија, туку и на национално ниво. Преку современи студиски програми, комбинација од теоретска обука и практична настава, ќе се подготвуваат кадри што ќе одговорат на реалните предизвици на здравствениот систем.
Основачкиот концепт вклучува четиригодишни студии и специјализирани магистерски програми, со акцент на квалитетна едукација, научна вклученост и меѓународна поврзаност. Одлуката на Владата се заснова врз согледаните општествени приоритети – стареење на населението, хронични болести, дигитализација и недостиг на стручен кадар.
Истовремено, оваа иницијатива е резултат на активната заложба на раководството на УКЛО, предводено од ректорот проф. д-р Игор Неделковски, и поддржана од низа институции, локалната самоуправа и здравствени организации.
Формирањето на новиот факултет е уште една потврда за развојната ориентација на Универзитетот. Со ова, Битола добива нова академска вредност и можност да се позиционира како значаен центар за медицинско образование и развој на здравствени политики во регионот.
