Регионот Преспа доби значаен технолошки исчекор со инсталирањето на LoRaWAN и Sigfox мрежа, што претставува основна инфраструктура за развој на IoT решенија. Иницијативата ја спроведува Фондацијата ПРЕДА Плус како дел од активностите на PLUS Акцелераторот во Ресен, со цел поттикнување иновации, развој на стартапи и дигитална трансформација на руралните заедници.
Покриеноста со LoRaWAN и Sigfox е клучна за современите IoT системи, бидејќи обезбедува комуникација на големи растојанија, ниска потрошувачка на енергија и минимални трошоци за функционирање. Ова ја прави технологијата идеална за паметно земјоделство, мониторинг на животна средина, логистика, паметни јавни услуги и безбедносни системи.
Со поставувањето на мрежата во Преспа, регионот станува атрактивен за стартапи, инвеститори и технолошки компании, што го зајакнува локалниот иновациски екосистем и ги отвора вратите за економски развој.
IoT лабораторија во Ресен за практична поддршка за млади компании
Во рамки на PLUS Акцелераторот кој се наоѓа во средно училиште во Ресен, ПРЕДА Плус воспостави IoT лабораторија опремена со сензори, уреди и мрежна поврзаност, овозможувајќи им на стартапите и иноваторите пристап до реални услови за тестирање и
развој. Лабораторијата претставува единствен простор во регионот каде младите компании можат да ги креираат и валидираат своите прототипи.
Клучни придобивки за стартап заедницата
Интеграцијата на LoRaWAN и Sigfox носи повеќе бенефити за развој на технолошки компании:
-ниски трошоци за поставување уреди поради отсуство на SIM картички и претплати
-можност за создавање решенија во паметно земјоделство, загадување, логистика, јавни услуги и безбедност
-погодна средина за пилот проекти со голем дострел и ниска потрошувачка
-потенцијал уредите да работат 5 до 10 години на една батерија
-развој на нови хардверски компании, IoT платформи и аналитички сервиси
-создавање на паметни општински решенија и пазар за локалните стартапи.
Оваа основа го позиционира регионот како подготвен за нова фаза на дигитална
модернизација. Фондацијата ПРЕДА Плус постојано работи на јакнење на локалните заедници преку технологии, иновации и претприемништво. Со инсталирањето на LoRaWAN и Sigfox мрежа и отворањето на IoT лабораторијата, организацијата создава инфраструктура што ќе им служи на генерации иноватори.
Со оваа иницијатива, Преспа се позиционира како регион подготвен за интегрирање на напредни технолошки решенија и влегува во мапата на подрачја што го поддржуваат развојот на стартапи и дигитални услуги.
