Синоќа во Битола во одличен ракометен амбиент во салата “Боро Чурлевски“ германски Магдебург ја забележа четвртата победа од исто толку меѓусебни дуели со Еурофарм Пелистер. Европскиот шампион беше сигурен на гостувањето во Битола и го забележа деветтиот триумф во групата “Б“, и лидерската позиција.
Од друга страна тимот на Еурофарм Пелистер се претстави во достоинствено издание, во борба на паркетот, но не можеше да го надополни квалитетот на противникот.
По натпреварот своите впечатоци од натпреварот ги изнесе тренерот Рубен Гарабаја, кој нагласи дека е горд на одиграната партија на сите ракометри против така силна екипа како Магдебург.
-Ова е целосно поинаков пораз за разлика од минатиот против ПИК Сегед. Горд сум на моите ракометари, бидејќи денес игравме против еден од најдобрите тимови во светот. Горд сум на пристапот и играта „еден на еден“. Магдебург е многу добар во таа игра, но денес докажавме високо ниво на игра во одбрана, но тоа не беше доволно. Сепак, мора да продолжиме со нашата работа и да се гордееме, бидејќи денес бевме на нивото.На почетокот промашивме неколку лесни шутеви, а и лесно загубивме многу топки во првиот дел. Имавме осум загубени топки во првиот дел, во вториот само една. Но, ако правиш грешки против екипа како Магдебург многу тешко е да издвојуваш позитивен резултат“, рече шпанскиот стратег.
Следен противник на Еурофарм Пелистер во европската елита ќе биде Загреб, кој го победија во Битола.
