Вечерва во големата сала на Центарот за култура – Битола свечено беше отворен 17. Фестивал на музика од светот, со одличен концерт на групата “Фонтана“ предводена од кларинетистот – Благојче Трајковски, а сето тоа дополнето со емотивниот настап на турската уметница – Гамзе Матраџи по потекло од Македонија, а оние кои не успеаја да бидат дел од преполнетата сала имаат и за што да жалат. 
17. Фестивал на музика од светот за отворен го прогласи директорот на Центар за култура Битола, Сашо Илковски кој рече:
-Овој фестивал ја претвора Битола во една точка на културна поврзаност и уметничка инспирација, а тоа не е само фестивал — тоа е средба на култури, јазици и звуци што се спојуваат во едно единствено чувство: музиката како универзален јазик на човештвото. Фетивалот ќе се одржи фестивалот под мотото „Уметноста на звукот“. Во ова издание го истражува просторот меѓу тишината и вибрацијата, меѓу интонацијата и емоцијата. Звукот не е само средство за изразување, тој е форма на уметност што допира подлабоко од зборот, што ја создава врската меѓу слушателот и изведувачот, меѓу традицијата и модерноста, меѓу локалното и светското.
Битолчанецот Благојче Трајковски со своите изведби на кларинет не остани никој да биде рамнодушен, се заблагодари на организаторите, на покровителите на фестивалот, на публиката и сите вработени во Центарот за култура, за напорите да се организира еден ваков фестивал на високо ниво кој ќе трае пет дена, до понеделник.
-Со Гамзе настапивме на овој фестивал заедно пред десет години и секогаш се прашуваме кога ќе го повториме, и ете даде Бог да се собереме, денес, тука заедно, со најубавата публика во светот, која не тера бескрајно да трепериме, бескајно да имаме трема која на друго место ја немаме. Уште ќе додадам дека сме пресреќни што ги споделуваме овие моменти заедно со Гамзе која ние на срце и бескрајно ја почитуваме. Ви посакуваме прекрасна вечер во Битола, ние ветуваме дека ќе ви дадеме бескрајната љубов преку музиката, рече Благојче.
Турската уметница Гамзе Матраџи по потекло од Македонија, од градот Велес, со многу емоции го “испеа“ концертот во Битола, а на добар и симпатичен македонски јазик, се обрати непосредно до публиката и рече:
-Лесно ми е да пеам на македонски јазик, но потешко ми е да зборувам, но нема врска, за мене е најубаво што сум тука во овој преубав град заедно со вас. Кога зборувам може да ми побегне по некој збор, но вие правете се дека се е перфектно. Но, ако забележите дека грешам во изговорот на некој збор слободно насмеете се, нема да ви замерам.
Гамзе Матраџи испеа македонски песни, песни посветени на Битола, песната која му била омилена на Ататурк исто така посветена на Битола, и за крај, на бис, “Битола мој роден крај“ од Ајри Демировски, најпознатата песна за Битола.
Како и на секој концерт на Благојче и “Фонтана“ во Битола, така и овој пат беа изведени две песни во чест на битолчани кои оставиле трага во музиката во Битола. Оваа вечер тоа беа Калица и Пепи Бавтировски, со песните „Ако одам во Битола“ и “Ако згрешам нека изгорам“.
Утре на втората фестивалска вечер ќе настапи Тања Царовска заедно со Камерен оркестар Битола.
Жанета Ристевска
Фото: Сашо Ристевски
