Денеска во Битола пред започнување на прволигашкиот натпревар Пелистер – Македонија ЃП на теренот се одржа мала свеченост, со активното играње фудбал заврши поранешниот фудбалер и капитен на тимот, 38 годишниот Благојче Љамчевски.
Благоја Љамчевски потекнува од фудбалско семејство, дете е на Пелистер, а во првиот тим на Пелистер започна да игра во 200 година. Одигра 200 натпревари во “зелено-белиот“ дрес, три сезони беше капитен на тимот, денес беше поздравен од битолската публика, а од сегашниот капитен, Мирко Ивановски, доби подарок.
За својата фудбалска кариера, на кратко, денес кога и официјално го соблече фудбалските копачки, Благојче Љамчевски ни рече:
-Дете сум на Пелистер, уште од мал сум на стадион заедно со мојот татко Љупчо и чичко ми Наумче, подоцна и брат ми, и ги поминав сите фудбалски скалила во клубот, започнувајќи од пионерска конкуренција. Првиот натпревар во првиот тим го одиграв на 17 години, а тогаш довербата ми ја даде покојниот тренер на Пелистер, Томе Димитровски – Тарзано. Игравме против Шкендија од Арачиново и победивме со 2:1, не постигнав гол, но бев многу среќен, а како да не бидам кога ми се оствари детскиот и тинејџерски сон, да играм за Пелистер, во Битола, пред моите родители, роднини, другари, комшии…
За тоа како ќе памети својата фудбалска кариера Благојче ни рече:
-Во целост задоволен сум од мојата кариера, но како и во секоја работа, посебно во спортот има успони и падови, кои не се забораваат. Во многуте фудбалски, убави, работи има и некои кои не биле добри за нас фудбалерите, клубот, градот. Сега додека разговараме се присетив на 2009 година кога по превирањата во ФФМ ни избришаа 16 бода, а имавме шанса да дојдеме до трофеј, бевме втори, а потоа по одземањето на бодовите бевме на четврто место. Се сетив и на 2017 година кога пред завршување на полусезоната се распадна клубот, а сите моравме да бараме нови клубови…
На Благојче Љамчевски во јуни оваа година му заврши фудалската кариера, сега одмара, а како ќе продолжи неговата спортска кариера останува да видиме и да му посакаме овие денови на одмор убаво да ги помине, по многу години играње фудбал и пет сезони во дресот на Пелистер заслуѓен одмор, а за брзо да ги слушнеме новите вести.
Благојче Љамчевски во својата фудбалска кариера освен за Пелистер играше и за Тиквеш, Шкупи, Вардар, Металург, Победа, Работнички и Македонија Ѓорче Петров како младинец.
Текст и фото: Сашо Ристевски
