Битолчанецот Виктор Димовски е првиот директор на новоформираната Агенцијата за национална безбедност, која ќе работи независно од Министерството за внатрешни работи и произлегува од поранешно УБК.
Агецијата започна со работа од денеска, а Димовски на ова место дојде со избор на Владата во јуни оваа година.
Димовски е доктор на политички науки и дипломат од кариера со повеќе од дваесет години дипломатско искуство, а од 2017 година беше државен секретар во Министерството за надворешни работи.
Во изминатиот период бил вонреден и ополномоштен амбасадор на нашата земја во Србија и Црна Гора, како и во државата Израел.
Извршувал и други одговорни должности во Министерството, како помошник министер, државен советник и специјален советник.
Димовски бил национален координатор на нашата земја во повеќе регионални иницијативи, претседавач на Комитетот на политичките директори на Процесот за соработка во Југоисточна Европа и претседател на македонскиот дел на Државната комисија за утврдување на границата со СР Југославија.
Во периодот од 2007 до 2009 година Димовски бил директор на Агенцијата за разузнавање.
