Општина Битола, оваа година го организира дванаесеттото издание на Битолското културно лето „БИТ ФЕСТ“ кое ќе трае од 21 јуни до 28 август, а денес го објави јавниот повик за кофинансирање на манифестации и проекти од областа на културата.
Заинтересираните страни можат да се јават на јавниот повик и да понудат проекти од: музичко и музичко – сценска уметност, театар, ликовна уметност, видео, фото, филмска уметност, литература, фолклор како и нови уметности.
Право на учество на јавниот повик имаат сите заинтересирани субјекти, физички лица, правни лица, здруженија на граѓани и владини и невладини организации од областа на културата.
Во јавниот повик се образложени и критериумите за конкурирање и оценување на проектите во кои е наведено дека: проектот/програма/активност носи 30 бода, биографија или портфолио на субјектот (реализирани проекти) – 20 бода и степенот на влијание на проектот врз квалитетот на културниот живот на заедницата – 10 бода.
Максималниот износ за кофинансирање на трошоците по проект од страна на Општина Битола изнесува 60% од вкупната вредност на проектот.
Понудите за учество во програмата на „БИТ ФЕСТ 2018“ ги очекуваме најдоцна до 13.04.2018.
