Сите битолски угостители постапија по препораките на Владата по предлог на министерот за здравство да ги затворат угостителските објекти по 18 часот.
Широк Сокак, вечерва, после 21 часот речиси празен, а само малкумина кои имаат неодложна работа или пак редовно пешачат во ова време беа на улицата.
Исто и на битолското шеталиште битолчани кои пешачеа се броеја на прстите на рацете.
Сите кафулина, почнувајќи од првото на Широк Сокак, на “Магнолија“, “Кафе-кафе“, потоа кафе слаткарницата “ГТ“, “Портал“, “Пајтон“, Градската кафеана на “Епинал“, пицеријата “Буре“, “Добри вибрации“, “Аеро“, “Шведскиот“ се затворени, како и сите други сендвичари, пицерии…
И “бутките“ на Шеталиште се затворени, а битолчани кои сакаат да јадат “Кај Бомбата“ или другите сендвичари ќе почекаат до следната препорака, која би била “полесна“.
Немо беше и на “Кумурното“ каде редовно во ова време има млади фудбалери, а темница е и во спортската сала “Боро Чурлевски“.
Иста е ситуацијата и во Старата битолска чаршија, каде се затворени и малкуте угостителски објекти кои таму работеа.
С.Р.
