Press "Enter" to skip to content

Универзитетот “Св. Климент Охридски“ – Битола забележа огромен напредок од 1.400 места на светската листа според “Вебометрикс“

Веб-страницата „Вебометрикс“, која прави рангирање на универзитетите во светот, ја објави најновата ранг-листа на најдобри универзитети.

Универзитетот „Свети Климент Охридски“ во Битола годинава е на 3.647. место и забележа огромен напредок од 1.400 места на светското рангирање откако лани беше рангиран на 5.047. место.

Од универзитетите во Македонија, на највисоко место се наоѓа Универзитетот „Свети Кирил и Методиј“ во Скопје, а се наоѓа на 1.598. место. Сепак, најстариот универзитет во земјава бележи пад бидејќи минатата година се најде на 1.526. место. Тоа е пад од 72 места.

Универзитетот „Гоце Делчев“ во Штип се најде на 2.995 место и тој бележи напредок. Имено, УГД лани беше на 3.632. место, што значи дека годинава се искачил за 637 места погоре на листата.

Универзитетот на Југоисточна Европа се најде на 4.567. место на ранг-листата. На 4.633. место се најде Државниот универзитет во Тетово, а најлошо рангиран универзитет во Македонија е „Визион“, кој се најде на 32.029. место.

На првите три места се наоѓаат универзитети од САД. Прв е „Харвард“, а по него следуваат „Стенфорд“ и Технолошкиот институт во Масачусетс.

Универзитетите се рангирани според нивното влијание, отвореност и исклучителност.