Во рамките на одбележувањето на 80 години од основањето, во Националната установа Универзитетска библиотека „Св. Климент Охридски“ Битола, се одржа промоција на Монографијата, посветена на оваа установа во периодот 1945-2025 година.
По прикажувањето на документарен филм, поздравна реч одржа директорката на НУУБ „Св. Климент Охридски“, м-р Емилија Стефановска Дафкова која рече:
-Со голема чест и искрено задоволство денес ја претставуваме Монографијата посветена на осумдесетгодишнината од постоењето на Националната установа – Универзитетска библиотека „Св. Климент Охридски“ – Битола. За нас, авторите и уредниците, овој труд беше вистински предизвик и инспирација. Нашата одлука да создадеме монографско издание кое е поинакво од претходните произлегуваше од желбата оваа книга да биде не само сведоштво за историјата, туку и документ кој живее со времето и говори со иднината.
Библиотеката, која со гордост го носи името на св. Климент Охридски, а е вкоренета во градот Битолакако град на Via Egnatia, претставува симбол на континуитет и културна меморија. Важно е да се потенцира дека нашата институција е наследник и продолжувач на една книжевна и културна традиција чијашто историја започнува од X и XI век, преку првите манастирски библиотеки на територијата на Битола и битолско а своето влијание го задржува низ целиот период до XVII век, како што сведочат зачуваните ракописи од овој регион. Затоа и овие осум децении не се само временска одредница, туку значаен период на воспоставување, унапредување и зачувување на македонската писменост и книжевност.
Монографијата документирано и систематски ја прикажува историјата на нашата библиотека, нејзините изданија, современите активности и трансформацијата во институција која одамна ја надмина улогата на класично библиотекарско депо. Денес, НУУБ „Св. Климент Охридски“ е активен центар на дигитализација, на мултимедијални настани, на современи медиумски комуникации и на едукативни процеси, прилагодувајќи се на новите потреби на заедницата.
Со својот универзитетски статус, Библиотеката е исправена пред обврската да биде проактивен учесник и во областа на науката. Затоа, оваа монографија не е само приказ на минатото – таа е патоказ за иднината, за визијата и мисијата на една институција која и понатаму ќе остане чувар и на културното наследство.
За самата монографија, нејзината содржина и историскиот осврт, говореше промоторката проф. д-р Наташа Котлар.
На градоначалникот на општина Битола, Тони Коњановски, му беше доделена плакета во знак на благодарност за соработката со оваа значајна битолска установа.
Плакета му беше доделена и на “Графопром“ Битола компанија која ја испечати монографијата.
Фото: Дамијана Ристевска
