Со доаѓањето на пролетта и убавото време – под ведро сино небо и топли сончеви зраци – Битола повторно ја открива својата препознатлива душа: топла, жива и исполнета со боја. Деновиве, благодарение на посветеноста на ЈП “Комуналец“, просторот околу Саат Кулата и кај Безистенот е уреден со внимание и вкус, претворајќи се во вистинска мала оаза за одмор, прошетка и уживање. Украсни жардинери исполнети со шарени цвеќиња, внесуваат свежина и радост.
Во пресрет на Велигденските празници, централното градско подрачје доби и дополнителен сјај со празнични елементи што ја доловуваат топлината и значењето на празникот. Просторот е уреден, чист и пријатен за прошетка, а секој агол нуди прекрасна глетка.
Битола во овој период изгледа достоинствено, празнично и живо – како град што го слави животот, традицијата и заедништвото. Слика што сите посакуваме да ја гледаме не само за празници, туку во текот на целата година.
Чистотата и уреденоста не остануваат одлични. Минувачите застануваат, со задоволство ги набљудуваат деталите, фотографираат и ги споделуваат убавите моменти, а забележавме и странски туристи со велосипеди. Ваквите сцени внесуваат радост и гордост кај секој што го сака својот град.
Овие мали, но значајни моменти ја враќаат вербата во убавината на заедничкиот простор и во грижата за градот.
Оваа прекрасна глетка е потсетник дека Битола има потенцијал да биде уште поубава – не само за празници, туку секој ден. И не само во овој дел од градот туку насекаде. Со малку повеќе грижа, одговорност и љубов кон градот, ваквата слика може да стане наша секојдневна реалност.
