Меѓународниот ден на младите во Битола беше одбележан со креативност, едукација, дружење и многу младинска енергија Во рамки на Младинскиот центар Битола, организациите СФЕРА Интернешнал, ИМКА Битола и Младинскиот културен центар – Битола (МКЦ) реализираа три различни активности, обединети околу една заедничка цел – да им понудат на младите простор во кој можат да создаваат, да учат, да разговараат за теми што ги засегаат и да се поврзуваат.
Во просториите на Младинскиот центар Битола, СФЕРА Интернешнал организираше креативна работилница посветена на рачното творење. Младите работеа со глина, истражуваа различни форми и текстури и создаваа сопствени уникатни изработки. Преку плетењето, пак, имаа можност да научат нови вештини, но и да развиваат трпение, концентрација и меѓусебна поддршка. Работилницата создаде непосредна атмосфера во која учесниците си помагаа, разменуваа идеи и преку креативноста го изразуваа сопствениот индивидуален печат.
На истата локација, ИМКА Битола ја реализираше интерактивната активност „MindfulBytes“, посветена на дигиталниот свет и неговото влијание врз вниманието, навиките и изборите на младите. Преку игри, дискусии, тимска работа и ситуации од секојдневниот живот, учесниците разговараа за тоа како ги користат технологијата и социјалните мрежи, како да препознаваат манипулативни содржини и критички да ги проценуваат информациите, но и како да градат поздрави дигитални навики. Посебно внимание беше посветено на дигиталната благосостојба и на потребата младите да бидат свесни и активни корисници на технологијата, наместо само пасивни консументи на дигитални содржини.
Одбележувањето продолжи во дворот на МКЦ Битола, каде Младинскиот културен центар, во соработка со центарот за психотерапија „Свесност“, организираше интерактивна работилница посветена на личниот развој, целите и мотивацијата на младите. Низ разговор, размислување и споделување лични искуства, младите имаа можност да зборуваат за она што ги мотивира, предизвиците со кои се соочуваат и она што ги движи напред. По работилницата, програмата продолжи со неформално дружење и музика со DJ Chiko, заокружувајќи го денот во опуштена и позитивна атмосфера.
Трите активности покажаа различни аспекти од она што денес значи младинска работа – од креативно изразување и стекнување практични вештини, преку дигитална писменост и критичко размислување, до личен развој, мотивација и социјално поврзување.
Преку заедничкото одбележување на Меѓународниот ден на младите, Младинскиот центар Битола уште еднаш ја истакна важноста од постоењето на отворен и достапен простор за младите во градот. Простор во кој различни организации можат да ја спојат својата експертиза и да создаваат разновидни можности, а младите да бидат активни учесници – да учат, да создаваат, да се изразуваат, да се дружат и да придонесуваат кон младинскиот и културниот живот во Битола.
