Македонското трио Интерарт од Битола се претстави пред римската публика со концерт во рамките на престижниот Festival Musicale delle Nazioni – Concerti del Tempietto, традиционална летна концертна серија што се одржува во историскиот амбиент на Театарот на Марцел во Рим.
Концертот се одржа во Chiostro di Campitelli al Teatro di Marcello, простор во непосредна близина на античкиот Театар на Марцел, едно од препознатливите историски места во центарот на Рим. Пред публиката настапија Емилија Ристевска Стефановска и Александар Стефановски на флејта, и Татјана Божиновска на пијано, со програма која ги обедини современиот музички израз, танцот и фантазијата.
На концертот беа изведени „Three Dances“ од Gary Schocker, „Ivino“ од Marko Videnović, „Marbella Fantasy“ од Andrey Rubtsov и „Trio“ од Jean-Michel Damase. Програмата, со својот жанровски и стилски распон, овозможи да се истакнат виртуозноста на флејтите и богатата звучна палета на камерниот состав.
Настапот во Рим е значајно меѓународно претставување за битолското трио, кое во континуитет ја гради својата концертна активност и надвор од Македонија. Особено значајно е присуството на македонски уметници во рамките на фестивал кој на една од највпечатливите историски сцени во Рим ги поврзува музичарите од различни земји.
Концертот беше реализиран во рамките на проектот поддржан од Culture Moves Europe, со финансиска поддршка од Европската Унија, во партнерство со Concerti del Tempietto.
За триото Интерарт, гостувањето во Рим претставува уште една важна потврда на нивната меѓународна концертна активност и можност македонската камерна музика да биде дел од европската културна сцена.
