“Најхрабрите“ битолчани, на шаховска табла, му се спротиставија на велемајсторот Влатко Богдановски (фотогалерија)

Денес во просториите на Меѓународниот Славјански универзитет во Битола се одржа настан кој како рекоа организаторите, МСУ, бил единствен од ваков вид во Македонија.

Битолскиот велемајстор во шах, Влатко Богдановски, одигра симултан натпревар – “симултанка“ со 30 препознатливи битолчани.

-Ме радува дека една високо образовна установа е организатор на шаховски турнир и симултан натпревар, бидејќи шахот е основа на компјутерската наука, која се изучува насекаде на сите високо образовни институции, а првата книга за шахот датира од почетокот на 16 век,а и тоа е поврзано со школувањето. Се надевам дека и во иднина ќе имаме вакви средби каде студентите и останатите ќе играат шах, рече пред почетокот на “симултанката“, велемајсторот, Влатко Богдановски.

Во име на организаторот на “симултанката“, Меѓународниот славјански унститут, раководителот, Игор Михајловски рече:

-Ова е еден од настаните кои сум ги организирал, а кои ќе ми останат во долго сеќавање. Благодарам на сите оние кои беа денес присутни и кои ја поддржаа идејата за возобновување на шахот во Битола.

По завршувањето на “симултанката“, само тројца битолчани, ќе можат да се пофалат дека одиграле реми со велемајсторот, а тоа се Сашко Павловски, Тони Коњановски и Весна Светозарева.