На Техничкиот факултет во Битола заврши тродневната, втора, меѓународна конференција „Транспортот во денешното општество“ (http://www.ttsconference.org), која се одржуваше во организација на Технички факултет Битола и Отсекот за транспорт и сообраќај, а во коорганизација на девет Факултети и Универзитети од поширокиот регион.
Конференцијата ја отвори Министерот за транспорт во владата на РМ, Горан Сугаревски, градоначалничката на Битола Наташа Петровска и генералениот секретар на Европската платформа за транспортни науки Себастијан Белтс, кои со своето присуство покажаа дека транспортот и сообраќајот се на највисоко општествено и институционално ниво.
-Јас ќе бидам лично среќен и професионално исполнет доколку конференцијата придонесе за размена на идеи и искуства, проширување на видиците, стекнување на нови сознанија и зајакнување на соработката, рече деканот на Технички факултет Битола проф. д-р Стојанче Нусев.
Генерални покровители на оваа меѓународна конференција беа Министерството за транспорт и врски и Општина Битола.