-Продолжуваме со активноста „Да им читаме на децата“. На иницијатива на негователката Гзиме Коминовска од градинката „Снегулка“ продолжуваме да читаме книги на нашите најмили и најмлади читатели во градинките. Секоја недела на сите групи ќе им прочитаме книги. Во соработка со градинката „Естреја Овадија Мара“ и директорката Лидија Тфирст Митреска се договоривме и за активности во градинката „Пролет“, за што им благодариме за интересот и вклученоста во проектот, вели координатор на проектот м-р Фатма Бајрам Аземовска, која беше заедно со библиотекарките Вера Марковска и Гордана Ѓоргиевска Неделковски во реализираната активност.
Истовремено беше промовирана акцијата за бесплатно членство на сите деца од 0-6 години. Читањето е клучна вештина која ни помага да учиме и да го живееме животот и затоа започнувањето со читање е возбудлива и важна фаза од развојот на децата. Како и со многу други вештини, децата постепено ги совладуваат вештините кои им се потребни за читање еден долг период, почнувајќи неколку години пред да можат да ја разберат смислата на напишаните зборови.
