Деновиве пред 10 години: со хеликоптер беше носена храна во завеаните села во Мариово (фото)

-Пред 10 години, во 2012 година, во седум мариовски села кои подолго време поради снежните врнежи буквално останаа отсечени од светот, храна, други прехранбени артикли и лекови им беа доставувани со хеликоптери, ова беше главна вест во сите медиуми во Македонија, започна со своите сеќавања Димче Миновски, хроничар на Битола и доајен на битолското новинарство. Властите се одллучија за овој потег откако се виде дека градежната механизација, на “Македонија пат“, “Македонски шуми“ и РЕК “Битола“ и покрај максималното ангажирање не ќе можат да ги исчистат патиштата за Мариово и да ги направат проодни, Центарот за управување со кризи и АРМ, ангажираа хеликоптер за да им достават храна на жителите од селата Будимирци, Градешница, Старавина, Зовиќ, Груништа, Ивени и Скочивир.На жителите од овие села, кои по последните големи снежни врнежи се буквално отсечени од светот им беше доставена храна во леб, брашно, шеќер, масло. Дел од помошта беше од стоковите резерви, а дел беше донација на локалната самоуправа на Новаци. Станува збор за 200 жители на кои да им се помогна, на начин кој единствено беше воможен.