Утрово, масовно посетен параклисот кај Црн мост во Битола, за денот на Света Петка – Летна на кој ден чуда се случуваат (фотогалерија)

Православните христијани денеска го одбележуваат празникот посветен на Света преподобна Параскева (Св. Петка). Во Битола се наоѓаат три верски објекти посветени на оваа светица, црква изградена во модерен стил, параклис и мала црквичка.Кај кружниот тек над реката Драгор, кај Црн Мост, повеќе од десетина години фукционира мал парклис посветен на Св. Петка. Параклисот беше на потпорниот ѕид од камен, пред да се изгради големиот кружен тек, каде сега се наоѓа убаво уреден простор.Вчера вечер и утрово овој мал простор на тротоарот на кружниот тек, го посетија голем број битолчани кои запалија свеќа и се помолија за здравје.Утрово околу стотина битолчани, пред се од околината на Црн мост, заеднички, организирано со присуство на свештено лице со почеток во 9 часот го започнаа одбележувањето на Св. Петка. А, на голема трпезариска маса, вредните кумови, домаќинки и димаќини се погрижија да има храна во озобилие и да бидат почастени сите гости.Повеќе од педесетина верници заеднички го направија адетот, “кревање на лепче“ за здравје, “вртејќи“ ја погачата меѓу себе, меѓу комшиите, онака како им рече свештеникот, како чин на поголемо заедништво меѓу нив.Годинава, како ни рекоа дел од присустните на ова заедничко одбележување на Св. Петка има петнаесетина кумови, кои се погрижија се да биде во најдобар ред, и сите да бидат послужени. Инаку, просторот го одржуваат жителите од овој дел, а може да ги пофалиме бидејќи секогаш е уреден и чист, а битолчани околу парклисот имаат убави место за одмор и дружење.Во Битола има три објекти кои се посветени на Св. Петка. Најновата и најмодерната црква “Св. Петка“ која е изградена во нашиот град се наоѓа во населбата, која битолчани сега ја знаат како “кај скопската пивара“. Кај кружниот тек над реката Драгор, кај Црн Мост, можеби десетина години фукционира мал парклис посветен на Св. Петка. На стотина метри од параклисот кај Црн Мост, пред неколку години беше изградена мала црквичка, а денес има новоизградена нова поголема црква, веднаш до малата. Малата црква е направена според каноните на МПЦ, има олтар со ликот на Св. Петка, а има и насликани фрески по ѕидовите. Инаку, Светата Православна црква празнува три личности со исто име Параскева-Петка поради што во народот често се мешаат и се мисли дека се работи за иста личност. Најчесто трите се идентификуваат со Петка Трновска, чиј спомен се одбележува на 27 октомври. Името го добиле поради тоа што се родени во петок, а петокот како ден пред сабота, (во стариот завет саботата била празник, а не неделата) бил ден за подготовки пред празникот. Во петокот евреите се подготвувале за саботата. Параскева значи подготовка.Света Параскева (Петка) според која се празнува денешниот ден е родум од Рим. Родителите и биле христијани, така што од мали нозе ја воспитале во Христовиот дух. Кога и умреле родителите го раздала целиот свој имот на сиромашните и се замонашила. Со голема ревност целиот живот го посветила на христовото учење. Поради тоа и пострадала, и била отсечена главата. Целиот настан се случил во вториот век.