-Викендов во Битола е актуелна “Белата ноќ“ на која двата дена присуствуваа голем број на битолчани, а се одржа на паркингот на плоштадот “Гоце Деллев“ пред Домот на културата во Битола, на која настапија Камерниот оркестар со други пеачи, а вчера Кирил Џајковски. Со оглед на тоа што рубриката е “Деновиве пред 10 години“ ќе се потсетиме, секако со помош на помладите, како беше “Белата ноќ“ пред 10 години, започна со своите сеќавања Димче Миновски, хроничар на Битола и доајен на битолското новинарство.
-Тоа беше, пред 10 години, исклучителен настан, огромен број на гости и преполнетост на амбиенталната улица “Широк Сокак“ беше сликата на затворањето на седмото издание на “Бит фест“ во 2012. После настапот на тројцата локални ди џеи, точно на полноќ, се случи круната на вечерта, настапот на светски познатиот ди џеј Дејвид Моралес, раскажува Миновски.
Битолчани и гостите од надвор со нетрпение го очекуваа овој голем музички настан, а имаа и што да чекаат. Исклучителната атмосфера беше надополнета со унифицираноста на 11 – те кафе барови долж Широк Сокак во бела боја и со бели балони, како и облеката на присутните од кои секој на себе имаше бел детал.
Широк Сокак во бело со Дејвид Моралес е исклучителен настан од кој впечатоците се големи, а оние кои беа таа августовска вечер на исклучителниот сет на светската ѕвезда сигурно се сеќаваат каде беа, во кое кафуле имаа резервирано, како беа облечени, со кој беа заедно таа вечер и уживаа до доцна во ноќта.
