Кошаркарите на Пелистер од Битола денес после тренингот, пред утрешниот натпревар со Тиквеш им приредија голема радост за дечињата основното училиште и реусресен центар “Кочо Рацин“ во Битола .
За хуманитарната акција ги спуштија кошевите на помала висина за да играат со децата со попречености, се дружеа, постигнуваа заедно кошеви, да “забиваат“, заедно да “одржат“ мал комплетен тренинг со учениците и за крај им поделија новогодишни подароци.
Ова беше ретка прилика дечињата да се дружат со кошаркарите на Пелистер, а им донесе огромна радост на нивните лица во пресрет на новогодишните и божиќните празници.
Сето тоа помина во фантастична атмосфера, а децата покрај игра и забава добија и подароци – новогодишни пакетчиња кои им ги поделија кошаркарите на Пелистер. Сите добија пригодни подароци од нивните миленици Лука, Костоски, Бојиќ, Стајиќ, Едвардс, Ташовски, Дарко и останатите, а присутен секако беше и тренерот Александар Петровиќ, заедно со неговиот стручен штаб. 
-Имам дете со посебни потреби и потребно е да им дадеме поддршка колку што е можно повеќе и да уживаме со нив секој ден. Ним најпотребна им е поддршката од нас. Мојот син има проблем со церебрална парализа и треба секој ден да се тренира со него, поддршка логопед, дефектолог, физикална терапија и што повеќе социјален живот да се дружи со другите деца, а еден вакон начин на дружење секако ќе им помогне, изјави кошаркарот на Пелистер, Андрија Бојиќ.
И кошаркарот Лука Стојановски, како и останатите кошаркари емотивно ја доживеа оваа средба со дечињата со попречености, но “собра храброст“ и рече:
-Тешко е да се зборува по една ваква средба со овие дечиња, но ќе кажам во име на сите кошаркати и тренери и управата дека ни е посебно мило што еве на еден ваков начин со игра, со дружење и со мали подароци им направивме еден поинаков ден. Ова е за прв организирано од кошаркарскиот клуб Пелистер, но се надевам дека и во иднана ќе имаме средби со овие дечиња.
Директорката на Ресурсниот центар Драгана Кирковска за оваа несекојдневна актовност рече:
–Уште во разговорите со управата на клубот рековме дека целта е децата да ја почувствуваат атмосферата во оваа спортска сала, а тоа и се случи. Нашите ученици денес за првпат беа тука и играа кошарка. Досега немаа почувствувано такво нешто и беа пресреќни.
Фото: Дамијана Ристевска
