-Во Битола од 4 до 10 мај се одржуваше осумнаесеттото по ред издание на Интернационалниот фестивал на монодрамата “Битола 2016“. Фестивалот свечено го отвори претставата “Животот е прекрасен“, која во чест на учесниците и гостите на фестивалот ја изведоа актерите на Македонскиот народен театар, започна со своите сеќавања Димче Миновски, хроничар на Битола и доајен на битолското новинарство.
Фестивалот траеше седум дена, а љубителите во театарската уметност имаа можност да погледнат тринаесет монодрами кои се натпреваруваа за престижната награда “Гран-при“, како и неколку претстави кои беа изведени вон конкуренција.
Актерката Јоланда Поденојте од Литванија за изведбата на монодрамата “Те чекам, злато“ по текст на Дарио Фо и Франка Раме, а во режија на Алвидас Визгирда беше годинашен лауреат на фестивалот. Наградата од публиката ја доби хрватскиот актер Озрен
Грабариќ за монооперата “Дневникот на лудиот“ по текст на Гогољ, а во режија на битолчанецот Марјан Неќак.
Фестивалот за отворен го прогласија тогашниот директорот на Центарот за култура-Битола Борче Димитровски и членот на меѓународното стручно жири Иван Лео Лемо од Хрватска, кој беше победник на Фестивалот на монодрамата во Битола во 2015 година.
Селекторот на програмата беше еминентниот битолски и македонски актер Петар Мирчевски, а на интернационалниот фестивал учествуваа актери од повеќе земји меѓу кои: Албанија, Србија, Македонија, Литванија, САД, Хрватска, Израел, Ерменија и Бугарија.
Беа одиграни македонските монодрами “Ќе има (ли) војна?“ на актерката и автор Ивана Атанасова, “Црв“, во режија и изведба на актерот Мите Грозданов, монооперата “Дневникот
на лудиот“, во изведба на хрватскиот актер Озрен Грабариќ, а во режија на Марјан Неќак, монодрамата “Писма од земјата“ во режија и изведба на Никола Тодоровски, како и “Чеканот“ во режија на Трајче Кацаров, а ја изведе актерот Трајче Јованов.
Престижната награда ја додели интернационалното жири во состав: Нина Мазур, Иван
Лео Лемо, Братислав Димитров, Билјана Крајчевска и претседателот Петар Темелковски.
Со претставата “Случајот на “Браќа Манаки“ Хармс“ од Театар Комедија Скопје беше спуштена завесата на годинашното 18. по ред издание на Интернационалниот фестивал на монодрамата во Битола.
