-По повод патрониот празник на СОУ Гимназија “Јосип Броз Тито“ – Битола сцената на Центарот за култура блесна во духот на младоста, уметноста и креативноста.
-Над шеесет ученици учествуваа во театарско-уметничкиот перформанс “Сонот на младоста“, глумејќи, танцувајќи и пеејќи, придружувани од училишниот бенд и солисти, создавајќи вечер исполнета со емоции, енергија и талент. Режисер на претставата беше Сара Радевска под менторство на професорката по македонски јазик Симона Петровска.
Патрониот празник оваа година беше вистинска прослава на уметноста, заедништвото и младоста – вредности што гимназијата со гордост ги негува и ги пренесува низ генерациите. На почетокот од свечената приредба, директорката Лидија Споа ги поздрави присутните со зборовите:
–Нашата институција, како симбол на знаењето и темел на образованието, претставува вистински образовен светилник. Гимназијата е сериозна институција која свесно и совесно ги профилира идните академски граѓани на оваа земја, градители на подобар и посовремен општествен поредок и одговорни личности, кои му се неопходни на нашето општество. Од оваа гимназија произлегле голем број академици, лекари, архитекти, професори, уметници и градоначалници. Денес стоиме заедно исполнети со гордост, благодарност и радост, славејќи ги успесите што нашето училиште ги создава со години наназад. Нашата гимназија не е само место каде што се стекнува знаење — таа е дом на вредности, посветеност, талент и заедништво.
–Со особена чест можеме да се пофалиме со бројните успеси на нашите ученици на државни и меѓународни натпревари, а овие искуства не само што ги збогатуваат знаењата на младите, туку ги учат и на почитување на различностите, пријателството и европските вредности. Но, најголемата вредност на нашата гимназија се луѓето — нашите професори. Тие несебично се вложуваат, со љубов и посветеност ги водат учениците, ги мотивираат да веруваат во себе и да чекорат храбро кон своите цели. Потоа нашите ученици кои постигнуваат врвни резултати во учењето и достојно го претставуваат училиштето на натпревари, проекти, олимпијади и меѓународни средби. Нашата воспитно-образовна и општествена мисија е да создаваме млади луѓе кои ќе бидат образовани, одговорни, хумани и подготвени да придонесуваат за подобро општество.
-Веруваме дека вистинскиот успех не се мери само со освоени признанија, туку и со вредностите што ги носиме во себе. Драги ученици, продолжете да сонувате, да учите, да истражувате и да се стремите кон нови височини. Вие сте гордоста на нашата гимназија и надежта на иднината, рече директорката Споа.
Потоа пред присутните се обрати заменик-градоначалничката Марина Крстиќ, која во име на Градоначалникот на Општина Битола го честиташе патрониот празник.
-Навистина ми претставува особена чест и задоволство што денес сум дел од прославата на патрониот празник на вашата и нашата гимназија. Дозволете најнапред искрено да ви го честитам 25 Мај — патрониот празник на оваа значајна образовна институција, која со децении претставува симбол на знаење, традиција и интелектуален развој на Битола. Во оваа свечена прилика би сакала да се навратам и на еден особено важен настан — чествувањето на 80 години настава на современ македонски јазик, одбележано токму овде, во оваа гимназија. Тоа не е само јубилеј на образованието, туку сведоштво за истрајноста, идентитетот и културното наследство на македонскиот народ, рече Крстиќ и додаде:
-Македонскиот јазик е нашиот глас, нашата меморија и нашата иднина. Тој е темел на нашиот национален идентитет, чувар на културата, традицијата и духовноста. Битола отсекогаш била град на културата, просветата и традицијата — град кој гордо го чува своето богато историско минато, но и храбро чекори кон иднината. А вашата гимназија е еден од најсветлите симболи на таа битолска традиција.
Општина Битола во изминатиот период вложи значителни инвестиции за училиштето да добие подобри услови и нов, современ лик. Беа обновени кабинетите по хемија, реконструиран е влезот на училиштето, заменета е старата дограма со нова, енергетски ефикасна, а поставена е и настрешница во летната училница — простор кој денес претставува место за учење, дружење и креативност. Сето тоа е доказ дека вложувањето во образованието е вложување во иднината. Нашите ученици заслужуваат современи услови, инспиративна средина и можности за развој на своите таленти и потенцијали.
По поздравните обраќања, на сцената започна театарско-уметничкиот перформанс „Сонот на младоста“, во кој учествуваа над шеесет гимназијалци. Режисер гимназијалката Сара Радевска.
Текстот за театарско-уметничкиот перформанс „Сонот на младоста“ го создадоа професорките Даниела Петровска, Весна Миндушева Велјановска и Милица Димитровска кои биле ученички во Гимназијата. Инспирирани од безвременското дело на Вилијам Шекспир „Сон на летната ноќ“ — приказна во која светот на соништата, љубовта и младешката фантазија магично се преплетува со реалноста.
Преку современ сценски израз, музика, танц и актерска игра, учениците испратија силна порака дека младоста е време на соништа, слобода, љубов и храброст да се верува во сопствените можности. Како и во делото на Шекспир, така и во „Сонот на младоста“, границата меѓу реалното и имагинарното исчезнува, оставајќи простор за надеж, креативност и магијата што ја носи младешкиот дух.
Претставата беше вистинско патување низ емоциите на младоста.
На крај на претставата на сцената се појави ментор професор по македонски јазик Симона Петровска. Со видлива возбуда и гордост, таа ги прегрна учениците — учесници во претставата — и со топли зборови им се заблагодари за секој миг поминат заедно, за секоја проба, секој вложен труд, секоја емоција и секој аплауз што заеднички го заслужија.
Во атмосфера исполнета со силни емоции, насмевки и солзи радосници, професорката упати искрена благодарност до сите ученици, професори и соработници што беа дел од „Сонот на младоста“, нагласувајќи дека токму заедништвото, љубовта кон уметноста и вербата во младите создаваат моменти што долго ќе се паметат. Таа емотивна сцена беше најубавата потврда дека ова не беше само претстава, туку приказна создадена од срце — приказна за младоста, пријателството и магијата што останува засекогаш.
На крајот од свеченоста беа доделени пофалници на учениците и менторите-професори кои во текот на учебната година постигнаа значајни резултати на натпревари, конкурси и проекти, придонесувајќи за успешна промоција на гимназијата.
Благодарници за успешна соработка им беа врачени и на институциите со кои СОУ Гимназија „Јосип Броз Тито“ – Битола остварува долгогодишна и плодна соработка.
Свечената вечер уште еднаш потврди дека гимназијата не е само образовна институција, туку место каде што младите ја развиваат својата креативност, ги остваруваат своите соништа и создаваат вредности што ќе траат низ времето.
Жанета Ристевска
Фотографии: Дамијана Ристевска
